Қолжазбалар және сирек кітаптар ұлттық орталығында «Bilim-Qazyna» қоғамдық қоры мен IRCICA ұйымының бірлескен жобасы аясында қазақ тіліне аударылған «Осман мемлекеті және өркениеті тарихы» атты екі томдық іргелі еңбектің салтанатты тұсаукесері өтті.
1299–1923 жылдар аралығындағы Осман мемлекетінің алты ғасырлық тарихы мен өркениетін қамтитын еңбек. Қазақ тілді ғылыми-танымдық әдебиеттің қорын байытып, тарих пен өркениеттің шынайы шежіресін танығысы келетін әрбір оқырман үшін таптырмас қазына.
Іс-шара барысында Ислам тарихы, өнері мен мәдениетін зерттеу орталығының (IRCICA) бас директоры профессор Махмуд Ерол Кылыч, Қолжазбалар және сирек кітаптар ұлттық орталығының директоры міндетін атқарушы А.Жанабаев, «Bilim-Qazyna» қоғамдық қорының президенті Сейдмұхаммед Абдунаим және белгілі тарихшылар, шығыстанушылар қонақтар сөз сөйледі.
