Астанада халықаралық каллиграфия шеберлік сағаттары өтіп жатыр. Жазу өнерін ы жаңғыртып жүрген шеберлер келушілерге бірнеше стильде графикалық жазу үлгісін көрсетті.
Фото: видеодан үзінді
Іс-шара кеше «құснихат» көрмесінен басталған. Көрмеде көптің көңілінен шыққан ең құнды жәдігер – Мұхаммед пайғамбардың папирусқа жазылған екі хатының көшірмесі болды.
Қырғызстандық Талайбек Қожамұратов Ислам каллиграфиясын 1992-93-ші жылдары үйрене бастапты. Сол уақытта Бішкектің бас имамынан тәлім алған ол кейінірек көне өнерден біршама уақыт қол үзіп қалған.
– Көркем жазу бойынша бірінші ұстазым Жолдасхан Маркұлы, екінші ұстазым Абдулмажит қари – Бішкектің имамы болған. Негізгі ұстаздарым осы кісілер болды. Бәрі сол кезден басталды. Кейін біраз тоқтап қалып, қайта бастағаныма да 21 жылдан асыпты.
– Иджазаңыз бар ма ?
– Иджаза жақында болады, – дейді каллиграф Талайбек Қожамұратов.
Ал, Асылбек Орынбасар Қазақстандағы иджазасы бар жалғыз каллиграф әрі елордадағы Республикалық бас мешіттегі көне жазулардың авторы. Ол мешіт қабырғаларын көркемдеуге 3 жыл уақытын жұмсаған.
– Мен Орталық Азия бойынша 5 мемлекеттің ішінде алғаш болып Ислам каллиграфисының иджазасын алған адаммын. 2022 жылы Бүкіл дүниежүзілік мұсылмандар қауымдастығына қарайтын Ирсика деген ұйым болған. Штаб-пәтері Түркияның Ыстанбұл қаласында. Сол жерден иджаза алдық, – деді каллиграф Орынбасар Асылбек.
Иджаза – каллиграфия өнерін өзге де шәкірттерге үйретуге болады деген рұқсат қағазы. Бір сөзбен айтқанда – диплом. Ол болмаса, өнерің бағаланбайды.
Каллиграфия – ғасырлар бойы қалыптасқан өнер мен руханияттың айнасы. Ол тек графикалық суреттер жиынтығы ғана емес, тарихы терең рухани мәні бар құнды мұра.
Жалпы араб каллиграфиясының жеті түрі бар. Соның ең көп тарағаны әрі ең көне түрі Девани стилі.
Қолжазбалар және сирек кітаптар орталығының бас сарапшысы Алмат Апсаликовтың айтуынша, каллиграфия тек қана араб графикасымен жазылмайды. Оның латын тілінде және кирилицамен жазылғандары да бар. Араб графикасының каллиграфиясы үлкен өнер әрі үлкен бір өркениеттің нышаны. Каллиграфия арқылы көп нәрсе түсінуге болады.
Айта кетейік, үш күндік шараның өтуіне «Орталық Азия Мұсылман ақсақалдар кеңесі» ұйымы мұрындық болды. Рухани жиынға зиялы қауым өкілдері, Сенат депутаттары мен қоса қала тұрғындары көптеп жиналды.
Осыған дейін Астанада 300 жас музыкант әйгілі күйлерді орындағаны туралы жаздық.
https://kaz.inform.kz/news/astanada-kalligrafiya-mamandari-bas-kosti-a3e9bb/
