Қолжазбалар және сирек кітаптар ұлттық орталығы құнды кітаппен толықты

80-нен аса сирек кездесетін құнды кітаптармен қолжазбаларды «Еңбек Ардагері» медалінің иегері Зәбида Айдосова ұлттық орталыққа тапсырды.

Зәбида Көшербайқызының айтуынша әкесі Көшербай 1911 жылы 25 қазанда Ақмола облысы Ақмол ауданы, қазіргі Целиноград ауданы Жаңажол ауылында дүниеге келген. 1940 жылы Ұлы отан соғысына кетеді. Украин жеріндегі қанды соғыста аяғынан қатты жараланып,1944 жылы елге оралады.

Зәбида Айдосова «Менің есімде қалғаны әкем оқыған жоғары білімді қари имам болған. Ақан ұстаздан 1955-1956 жж. арабша дәріс алған. Мен ол кезде небәрі 8 жаста, ағам Ғылман 11 жаста едік. Әкеммен бірге намаз оқитынбыз. 1964 жылы ұстаз Ақан ауырып жатқанда осы қолжазбалар мен сирек кітаптарды әкеме аманат еткен. Әкем қайтқаннан кейін кітаптар  ағамда, содан кейін менде болды. Сол кітаптарды бүгін Халықаралық кітап сыйлау күніне орай осы орталыққа тапысырып отырмын» деді.

Ұлттық орталық қоры 2024 жылы еліміздің бірнеше аймақтарына арнайы экспедиция ұйымдастырған болатын. Нәтижесінде Қазақстан тарихына қатысты жеке тұлғалардан араб, парсы, шағатай, төте жазуларындағы 130-ға жуық құнды қолжазбалармен толықты.