Астана қаласы, Мұстафа Шоқай атындағы №51 мектеп-гимназиясында «Мұстафа Шоқай – бүкіл түркі жұртының ұлы перзенті» атты III халықаралық ғылыми-тәжірибелік конференция өтті. Конференцияның мақсаты: Түркі халықтары азаттық қозғалысының көшбасшысы Мұстафа Шоқайдың тарихи тұлғасына қатысты өзекті мәселелерді талқылап, оның сан салалы саяси қызметі мен шығармашылық мол мұрасын насихаттау. Конференция жұмысына Астана Мемлекеттік Қызмет Хабы басқарушы комитет төрағасы Байменов Әлихан Мұхамедияұлы, ҚР Парламенті Мәжілісінің депутаты, т.ғ.д., профессор Әбіл Еркін Аманжолұлы сонымен қатар, ғалымдар мен ұстаздар қауымы қатысты. Аталмыш конференеция жұмысы барысында Франция, Германия, Әзербайжан және Түркияның Мимар Синан көркем өнер университетінің профессоры, Әбдіуақап Қара М.Шоқайдың қоғамдық-саяси қызметіне қатысты деректермен бөлісті. Қолжазбалар және сирек кітаптар ұлттық орталығынан т.ғ.д., профессор З.Дүкенбаева «Мұстафа Шоқай тұлғасының зерттелуі мен зерделенуі», т.ғ.к., доцент Г.Бисенова «Британия ұлттық архив қорларындағы М.Шоқай деректері» тақырыбында баяндама жасады.
